Laugavegur 25
101 Reykjavík
Iceland
info@thoka.is

Tel: (+354) 615-1834

Vefsíðugerð og vefhönnun: Dagný Lilja & Lou Jonker

Óséð

BJÖRK VIGGÓSDÓTTIR

14.JÚNÍ - 6.JÚLÍ 2013

Hlaða niður í PDF formi



Við verðum oft fyrir áhrifum eða hughrifum af einhverju í umhverfinu. Margt getur valdið því eins og til dæmis manneskjur, hlutir eða listaverk. Stundum eigum við erfitt með að finna fyrir þessum áhrifum því við erum svo fókuseruð á hinn staðbundna og áþreifanlega raunveruleika. Þegar við gefum okkur tíma til að staldra við og finna fyrir tilfinningum, hugsunum eða áhrifum þá erum við að finna fyrir hinu óséða. Þegar við fáum hugljómun eða hugboð getur kraftur hins óséða verið magnaður.

Rauði þráðurinn í lífinu er sambland af þessu tvennu, hinum óséðu tilfinningum og hinu séða og áþreifanlega í umhverfinu. Ef það myndast ójafnvægi á hugsunum okkar eða sýn á heiminn þá erum við ekki lengur jarðtengd. Heldur laus frá jörðu og svífum um.

Björk hefur löngum leitast við að skapa innsetningar sem kalla fram ákveðna skynjun í rými. Þær krefjast oft þáttöku áhorfandans og hvetja þá til að hörfa frá rökvísum hugsunum og hinum áþreifanlega raunveruleika og gefa ímyndunaraflinu lausan tauminn. Með þessari sýningu heldur Björk því áfram.

Innsetningin samanstendur af tveimur rólum sem brjóta upp sýningarrýmið. Einnig er varpað í rýminu draumkenndu myndbandsverki sem tekið er á óræðum stað og undir því er hljóðverk. Skynfæri áhorfandans eru örvuð á mildan hátt á meðan hann svífur í rýminu sem kallar mögulega fram - hið óséða.

Björk Viggósdóttir (f. 1982) býr og starfar í Reykjavík. Hún lauk BA námi í myndlist árið 2006 frá Listaháskóla Íslands og stundar nú meistaranám í hagnýtri menningarmiðlun í Háskóla Íslands. Hún hefur haldið fjölda einkasýninga og tekið þátt í samsýningum hér á landi og víða erlendis. Björk hefur einnig unnið í nánu samstarfi við tónskáld, tónlistarfólk og dansara við margar sýningar sínar. Síðasta einkasýning Bjarkar bar nafnið Aðdráttarafl og fór fram í Hafnarborg fyrr á þessu ári.

cargocollective.com/bjorkviggos/