Laugavegur 25
101 Reykjavík
Iceland
info@thoka.is

Tel: (+354) 615-1834

Vefsíðugerð og vefhönnun: Dagný Lilja & Lou Jonker

Herbergi 9

Sigga Björg Sigurðardóttir

5.apríl - 12.maí 2013

Hlaða niður í PDF formi



ÞOKA kynnir með ánægju sýningu á nýjum verkum Siggu Bjargar Sigurðardóttur og útgáfu bókarinnar, 9 Fingers, sem samanstendur af níu myndasögum eftir listakonuna.

Furðudýr og aðrar kynjaverur í ýmsum athöfnum hafa lengi verið viðfangsefni Siggu Bjargar. Verurnar eru oft á tíðum frekar ógeðfelldar og óhugnalegar en á sama tíma er hægt að skynja eitthvað mannlegt við þær. Margar þeirra eru stórar og loðnar með líkamshluta úr hlutföllum og búa þær í sínum eigin heimi sem gæti verið í annari vídd. Oft er ekki alveg ljóst hvað er á seiði en líkamsvessar og vandræðaleg atvik koma iðulega við sögu.

Í bók Siggu Bjargar hafa teikningarnar ölast líf með orðum. Sumar sagnanna innihalda söguþráð á meðan aðrar snúast um senur. Lesandinn fær að kynnast ákveðnum karakterum betur eins og frönskum kassa sem á við bagalegt vandamál að stríða og hárkúlunni Smith sem er ekki allur þar sem hann er séður. Þó margar af sögunum fjalli um eitthvað óþægilegt eða hræðilegt eru þær fullar af kaldhæðni og húmor sem hefur einkennt fyrri verk Siggu Bjargar.

Á þessari sýningu sem fengið hefur heitið Herbergi 9 hefur Sigga Björg skapað veröld í galleríinu sem líkist þeim heimi sem má finna í sögunum hennar. Blásið hefur verið lífi í karaktera og táknmyndir sem taka á móti áhorfandanum í formi skúlptúra. Á veggjunum má sjá teikningar sem unnar hafa verið út frá völdum þáttum í sögunum. Með innsetningunni brúar hún bilið á milli hennar myndheims og okkar heims.

Bókin 9 Fingers er gefin út í takmörkuðu upplagi og verður hægt að nálgast eintak í ÞOKU og uppi í afgreiðslu Hríms hönnunarhúss.

Sigga Björg Sigurðardóttir (f. 1977) býr og starfar í Reykjavík og Glasgow. Hún lauk BA námi í myndlist frá Listaháskóla Íslands árið 2001 og stundaði framhaldsnám í Glasgow School of Art þar sem hún útskrifaðist með MFA gráðu í myndlist árið 2004. Sigga Björg hefur haldið einkasýningar í galleríum á borð við Yancey Richardson Gallery, NY, Clark Galerie, Montréal, Kling og Bang Gallerí, Reykjavík og Galerie Adler, Frankfurt. Einnig hefur hún tekið þátt í fjölda samsýninga þar á meðal í Listasafni Reykjavíkur og Listasafni Gautaborgar í Svíþjóð.

www.siggabjorg.net